सत्य, निष्पक्ष र खोजमुलक समाचार
मगलवार, ७ जेठ २०७६ / Tuesday, 21 May 2019

शब्द सारथीलाई श्रेष्ठको सहयोग, आउँदो शृंखला हाईकु विशेष


प्रकाशित समय: आइतवार, ०१ : २१ बजे फाल्गुन ५ गते



शब्द सारथीलाई श्रेष्ठको सहयोग, आउँदो शृंखला हाईकु विशेष

चौतारा । जिल्लामा सञ्चालन भइरहेको सुन्ने सुनाउने शृंखला शब्द सारथीलाई स्थानीय समाजसेवी श्यामकृष्ण श्रेष्ठले आर्थिक सहयोग गरेका छन् ।

 

बार्षिक १२ हजार रुपैयाँ सहयोग गर्ने प्रतिबद्धता जनाएअनुसार १९ औं शृंखलामा श्रेष्ठले यो महिनाको सहयोग भन्दै एक हजार रुपैयाँ सहयोग गरेका हुन् ।

 

कार्यक्रममा शब्द सारथीका अध्यक्ष अमित घिमिरेलाई श्रेष्ठले नगद प्रदान गरे । हरेक शुक्रबार चौतारा साँगाचोकगढी नगरपालिका वडा नं. ५ को सभा हलमा हुने शब्द सारथीलाई श्रेष्ठले १६ औं शृंखलामा मासिक एक हजार रुपैयाँ सहयोग दिने प्रतिबद्धता जनाएका थिए । सारथीको यो शृंखलामा एघार कविहरुले आफ्ना सिर्जना वाचन गरे ।

 

अमित घिमिरेको कविताबाट सुरु भएको सुन्ने सुनाउने अभियानमा जीवन श्रेष्ठ, दिल कार्की, ध्र्र्रुवलाल श्रेष्ठ, किशोर बुढाथोकी, हेमन प्रधान, सुन्दर शिरीष, सुरेश बुढाथोकी, गणेश पुरी, दिपक थापा, अविरल अप्रिय, विजय नेपाललगायतले सिर्जना सुनाएका थिए ।

 

सारथीको १९ औं शृंखलामा सिन्धुपाल्चोक उद्योग बाणिज्य संघका प्रथम उपाध्यक्ष एवं समाजसेवी, साहित्यप्रेमी, श्यामकृष्ण श्रेष्ठ, नगरपालिकाका शिक्षा शाखाका स्रोत व्यक्ति डम्बरबहादुर श्रेष्ठ, चौतारा साँगाचोकगढी नगरपालिका वडा नं. ५ का अध्यक्ष नरमान श्रेष्ठ, नगर शिक्षा अधिकृत गणेश पुरीले सफलताको कामना गर्दै शब्द सारथीले सिन्धु साहित्यको संरक्षणका लागि महत्वपूर्ण भूमिका निर्वाह गरेको बताए ।

 

हरेक शुक्रबार हुने यो अभियानको सातौं शृंखला पर्यटनका लागि साहित्य गरिएको थियो । धार्मिक पर्यटकीय स्थल गौरातीमा सो शृंखलामा गरिएको हो । त्यस्तै नवौं शृंखला निर्मलाका निम्ति न्याय, १५ औं शृंखला मुक्तक विशेष गरिएको थियो भने १७ औं शृंखलामा कवि ध्रुवलाल श्रेष्ठको कविताकृति सुमन सिन्धुको विमोचन गरिएको थियो ।

 

आउँदो २० औं शृंखला हाइकु विशेष गरिन लागिएको शब्द सारथीले जनाएको छ ।