सत्य, निष्पक्ष र खोजमुलक समाचार
मगलवार, १३ माघ २०७७ / Tuesday, 26 January 2021

काठ अभावमा रातो मच्छिन्द्रनाथको पुनःनिर्माण अलपत्र


प्रकाशित समय: मगलवार, ०६ : १५ बजे मंसिर २३ गते



काठ अभावमा रातो मच्छिन्द्रनाथको पुनःनिर्माण अलपत्र

 ललितपुर । बुङ्मतीस्थित रातो मच्छिन्द्रनाथ मन्दिरको पुनःनिर्माण अलपत्र परेको छ । मन्दिर पुनःनिर्माणका लागि आवश्यक पर्ने काठ बजारमा अभाव भएसँगै पुनःनिर्माणमा ढिलाइ भइरहेको बताइएको छ ।

पुनःनिर्माणका लागि आठ बाइ आठ, छ बाइ छ, चार बाइ छ र चार बाइ चार प्रकारका काठ आवश्यक पर्ने हुन्छ ।

 

बजारमा ती प्रकारका काठ पाउन नसकिएको रातो मच्छिन्द्रनाथ मन्दिर उपभोक्ता समितिका अध्यक्ष अमिर शाक्यले बताए । सो प्रकारको काठ र इँटा मन्दिर पुनःनिमार्णमा प्रयोग गर्दा पर्न जाने करालो अर्थात भिरालो आफै मिल्ने र लामो समयसम्म पानी वा घामलेसमेत असर गर्न नसक्ने शाक्यले जानकारी दिए ।

 

उक्त मन्दिरको एक तला पुनःनिर्माण सम्पन्न भइसकेको छ भने गारो लगाउने काम ७० प्रतिशत सम्पन्न भइसकेको छ । अब माथिल्लो तलामा भने इँटा लगाउने र बीचबीचमा काठ राख्ने कामे बाँकी रहेको उनको भनाइ छ ।

 

यसैगरी सरकारले काठको मूल्य नतोकिदिएका कारण मन्दिर पुनःनिर्माणमा प्रयोग गरिने काठ खरिदमा व्यापारीले जति भन्यो त्यतिनै नगद तिरेर ल्याउनुपर्ने बाध्यता भएको शाक्यले गुनासो गरे । 

मच्छिन्द्रनाथ मन्दिर पुनःनिर्माण दोस्रो तलाको काम अघि बढाउन काठ अभाव भएसँगै आफूहरुले हिजो प्रतिनिधिसभाका सांसद पम्फा भुषाललगायत सम्बन्धित व्यक्तिसँग बसेर छलफल गरेको महानगरपालिका–२२ का वडाध्यक्ष अम्बिराज शाक्यले बताए ।

 

विसं २०७२ को भूकम्पमा क्षति भएको रातो मच्छिन्द्रनाथ मन्दिर श्रीलङ्का सरकारको  पाँच करोड आर्थिक सहयोगमा पुनर्निर्माण गर्ने भनिएको थियो ।