सत्य, निष्पक्ष र खोजमुलक समाचार
मगलवार, २४ मंसिर २०७६ / Tuesday, 10 December 2019

उपमेयर अधिकारीद्वारा गोदावरीका ७ स्वास्थ्य स्वयंसेविकालाई आर्थिक सहयोग प्रदान


प्रकाशित समय: शनिवार, ०९ : २४ बजे श्रावण २५ गते



उपमेयर अधिकारीद्वारा गोदावरीका ७ स्वास्थ्य स्वयंसेविकालाई आर्थिक सहयोग प्रदान

ललितपुर,धेरैजस्तो स्थानका जनप्रतिनिधिहरु सेवा र सुविधामुखि भैइरहेका बेला कतिपय जनप्रतिनिधिहरुको भने आफूले पाएको तलबभत्ता सामाजिक कार्यमा लगाउन थालेका छन्।

 

यस्तै सामाजिक कार्य गर्नुभएको छ गोदावरी नगरपालिकाकी उपमेयर मुना अधिकारीले।गोदावरी नगरपालिकाका की उपमेयर मुना अधिकारीले आफूले पाउने तलब भत्ता वापत प्राप्त भएको रकम गोदावरी नगरपालिका वडा नम्बर १४ का स्वास्थ्य स्वयंसेविकालाई प्रदान गर्नुभएको छ।

 

उहाँले सातजना स्वास्थ्य स्वयंसेविकालाई प्रति व्यक्ति ५ हजारका दरले आर्थिक सहयोग उपलब्ध गराउनुभएको हो। ९ जनाको दरबन्दी रहेको १४ नम्बर वडामा १६ जना स्वास्थ्य स्वयंसेविका कार्यरत छन्।

 

नौजना स्वास्थ्य स्वयंसेविकाले मात्र स्थानीय तहबाट सेवा सुविधा पाएको भएपनि सातजनाले कुनै सुविधा पाएका थिएनन्।

 

कहीँकतैबाट सेवा सुविधा नपाएका सातजना स्वास्थ्य स्वयंसेविकालाई उपमेयर अधिकारीले आफूले पाउने तलब भत्ताबाट उक्त सहयोग गर्नुभएको हो।

 

१४ नम्बर वडाको वडा कार्यालय भवनमा गरिएको एक कार्यक्रममा उक्त सहयोग उपलब्ध गराइएको हो। उक्त कार्यक्रममा वडा नं १४ का वडा अध्यक्ष जगन्नाथ महर्जनको समेत उपस्थिति रहेको थियो।