स्पेनलाई हराउँदै इटली युरो कपको फाइनलमा प्रवेश

एजेन्सी । इटली युरो कप फुटबलको फाइनलमा प्रवेश गरेको छ ।आज बिहान इङ्ग्ल्यान्डको वेम्बलीमा भएको पहिलो सेमिफाइनल खेलमा तीन पटकको च्याम्पियन स्पेनलाई हराउँदै इटली फाइनलमा प्रवेश गरेको हो । 

टाइब्रेकरमा स्पेन चार दुई गोलले पराजित भयो ।खेलको निर्धारित ९० मिनेट र अतिरिक्त समयमा एक एक गोलको बराबरी भएपछि खेल टाइब्रेकरमा गएको थियो । खेलको ६० औं मिनेटमा फेडेरिको चिएसाले गोल गर्दै इटलीलाई अग्रता दिलाएका थिए । खेलको ८० औं मिनेटमा अल्भारो मोराटाले गोल गर्दै स्पेनलाई एक एक गोलको बराबरीमा फर्काए । इटलीले सुरुवाती अग्रता जोगाउन सकेन।

यो जितसँगै इटली उपाधि नजिक पुगेको छ । अब इटलीले उपाधिका लागि इङ्ग्ल्यान्ड र डेनमार्कबीचको विजेतासँग खेल्नेछ । इङ्ग्ल्यान्ड र डेनमार्कको खेल आज राति पौने एक बजे वेम्बलीमा हुँदैछ ।