हत्यारा पक्राउ नगरे काम ठप्प पार्छौं-निर्माण व्यवसायी महासंघ

काठमाडौं ,नेपाल निर्माण व्यवसायी महासंघका महासचिव रामशरण देउजाले महासंघका अध्यक्ष शरदकुमार गौचनका हत्यारालाई सरकारले तत्काल पक्राउ नगरे मुलुकभर विकास निर्माणका काम ठप्प पार्ने चेतावनी दिएका छन् । महासचिव देउजाले बुधबार साँझसम्म हत्यारालाई पक्राउ गर्न सरकारलाई समय दिएको बताए । उनले हत्यामा संलग्नलाई पक्राउ नगरिएसम्म त्रिवि शिक्षण अस्पतालमा राखिएको गौचनको शव पनि नबुझ्ने जानकारी गराए । महासंघ अध्यक्ष गौचनको काठमाडौं,शान्तिनगरस्थित घरबाट निस्कनेबित्तिकै गोली हानी हत्या गरिएको थियो।राजधानीमा मंगलबार आयोजित एक कार्यक्रममा महासचिव देउजाले अध्यक्ष गौचनको हत्यासँगै महासंघका अन्य पदाधिकारीलाई पनि नम्बर नखुलेका टेलिफोनबाट धम्कीपुर्ण शैलीमा पैसा माग्ने काम भइरहेको बताए । उनले महासंघका अन्य पदाधिकारीको सुरक्षा प्रवन्ध गर्न पनि सरकारसँग माग गरे ।