नेपाल हङकङसँग ७ विकेटले पराजित, सेमिफाइनलमा युएईसँग खेल्ने

काठमाडौं, ७ असार।एसीसी महिला टी-ट्वान्टी च्याम्पियनसिप अन्तर्गत लिग चरणको अन्तिम खेलमा नेपाल पराजित भएको छ।

मलेसियाको किनरारा ओभलमा मंगलबार नेपाल हङकङसँग ७ विकेटले पराजित भएको हो ।नेपालले दिएको ११० रनको लक्ष्य पछ्याएको हङकङले १५.५ ओभरमा ३ विकेट गुमाउँदै ११२ बनाएर जित हासिल गर्यो ।

यस जितसँगै हङकङ समूह ‘बी’ विजेता सेमिफाइनलमा प्रवेश गरेको छ । नेपाल भने समूह उपविजेता बनेको छ ।एक खेल खेल्न बाँकी रहेको हङकङले ३ खेलमा ६ अंक जोडेको छ । र, समूहको शीर्ष स्थानमा रहेको छ ।

नेपाल ४ खेलमा ६ अंक जोडेर समूहको दोस्रो स्थानमा रहेको छ ।नेपालले सेमिफाइनमा समूह ‘ए’ को विजेतासँग खेल्नेछ ।