भारतको फुटबलमाथि फिफाले लगायो प्रतिबन्ध

काठमाडौं।विश्व फुटबलको सर्वोच्च निकाय फिफाले अल इन्डिया फुटबल फेडेरेसन (एआईएफएफ) लाई प्रतिबन्ध लगाएको छ ।

फिफाले आज भारतको फुटबल सङ्घलाई अनिश्चितकालका लागि प्रतिबन्ध लगाएको हो । फिफाले एआईएफएफमा बाहिरी शक्ति हाबी भएको भन्दै प्रतिबन्ध गरिएको जनाएको छ । फिफाले विधानमा आफ्ना सदस्य सङ्घहरू कानूनी र राजनीतिक हस्तक्षेपबाट मुक्त हुनुपर्ने प्रावधान राखेको छ । जुन भारतको फुटबलमा लागू नभएको फिफाको भनाइ छ । फिफाको प्रतिबन्धसँगै भारतले अब फिफा र एएफसीको अन्तर्राष्ट्रिय प्रतियोगिता र क्लब प्रतियोगितामा सहभागिता जनाउन नपाउने भएको छ ।

यस्तै भारतमा आगामी अक्टोबरमा तय भएको १७ वर्ष मुनिको महिला विश्वकप पनि सर्ने भएको छ । गत मे महिनामा भारतको सर्वोच्च अदालतले एआईएफएफलाई विघटन गरेपछि विवाद उत्कर्षमा पुगेको थियो । अब एआईएफएफको आफ्नै कमिटीले कार्यसम्पादन सुरु गरेपछि मात्र फुकुवाको ढोका खुल्ने फिफाले जनाएको छ ।