गृहमन्त्री विमलेन्द्र निधिद्धारा पदबाट राजीनामा

काठमाण्डौं, १७ वैशाख उपप्रधान तथा गृहमन्त्री विमलेन्द्र निधिले पदबाट राजीनामा दिएका छन् । नेपाली कांग्रेस र माओवादी केन्द्रले प्रधानन्यायाधीश सुशीला कार्की विरूद्ध महाभियोग प्रस्ताव दर्ता गरेपछि उक्त निर्णय प्रति आपत्ति जनाउँदै पदबाट राजीनामा दिएका छन्। पार्टी नेतृत्वले आफ्नो मन्त्रालय मातहतको प्रहरी प्रमुख नियुक्तिको प्रकरणलाई लिएर प्रधानन्यायाधीश सुशीला कार्की विरुद्ध जुन महाअभियोग प्रस्ताव दर्ता गरिएको छ त्यस सन्दर्भमा आफूसँग कुनै छलफल नगरेकोमा आपत्ति जनाउँदै उनले राजीनामा दिएका हुन्।

राजीनामाको विषयमा आफूले पार्टी सभापति शेरबहादुर देउवा प्रधानमन्त्री पुष्पकमल दाहाललाई फोनबाट जानकारी गराइसकेको उनले बताए। आफ्नो राजीनामा पत्रमा प्रधानमन्त्रीलाई सम्बोधन गर्दै गृहमन्त्री निधिले आफू संविधानलाई सर्वस्वीकार्य बनाउँदै हिमाल, पहाड र तराईरमधेसको संविधान बनाउन सधैँ सक्रिय र क्रियाशील रहने बताएका छन्।