बचत सहकारीको चुनाव, कोही भोज खुवाउने, कोही घर घर जाने !

ललितपुर, ललितपुर जिल्ला बचत तथा ऋण सहकारी संघको चुनावमा मतदाता तान्न भोज खुवाउने प्रतिस्पर्धा भइरहेको छ ।

फागुन १८ गते हुने चुनावमा आफ्नो बर्चस्व देखाउन र सहकारी संस्थाका मतदाताहरुलाई आफूतर्फ आकर्षित गर्न दैनिक पार्टी प्यालेसमा भोज भत्तेर भइरहेको छ । संघको २४ औं साधारण सभा तथा नया कार्यसमिति चयनका लागि हुने फागुन १८ गते चुनाव सहितको अधिवेशनमा वर्तमान अध्यक्ष रामशरण घिमिरे र वर्तमान सचिव रामहरि बजगार्इ चुनावी मैदानमा रहेका छ्न ।

ललितपुर बचत तथा ऋण सहकारीमा ५११ वटा सहकारी आबद्ध रहेका छन जसबाट ४५४ जनाले मतदान प्रक्रियामा भाग लिन पाउनेछन । सोही आधारमा अध्यक्षका उम्मेदवारहरुले दैनिक भोज भत्तेरका कार्यक्रम राखेका छन । कहाँ कहाँ राखियो भोज ! बुधबार इन्द्रेणी व्याङ्केट इमाडोलमा नेकपा निकट रामहरि बजगाई टीमले भोज आयोजना गरेको थियो ।

महालक्ष्मी नगरपालिकाका सहकारी प्रतिनिधिहरुलाई लक्षित गरेर भोज राखिएको एक सहकारी अभियन्ताले जानकारी दिए । महालक्ष्मी नगरपालिकामा ५१ जना प्रतिनिधि छन् । भोज खाने कार्यक्रममा ४० जना उपस्थिति भए पनि सहकारी प्रतिनिधिहरुको उपस्थिति न्युन रहेको र नेताहरुको बढी उपस्थिति रहेको एक सहभागीले बताए । कार्यक्रममा मेयर रामेश्वर श्रेष्ठ, उपमेयर, वडाअध्यक्षहरुको उपस्थिति रहेको थियो, नगरपालिकाले जस्तोसुकै कदम, सहयोग गर्न तत्पर रहेको मेयरले बताए । कार्यक्रम बेलुका ६ बजेदेखि ९ बजेसम्म चलेको थियो । त्यसैगरी बिहीबार नेकपा निकट सहकारीकर्मीहरुको कुमारीपाटीमा अवस्थित अग्नी पार्टी प्यालेसमा भोज बिहान ८ बजेदेखि १२ बजेसम्म चलेको थियो ।

त्यसैगरी शुक्रबार गोदावरी नगरपालिकाका प्रतिनिधिहरुलाई लक्षित गरेर भोज आयोजना गर्ने भनिएतापनि देशमा विसम परिस्थितिको सृजना भएको भन्दै बिहीबार बेलुका ५ बजे बज्रबारही पार्टी प्यालेसमा भोज आयोजना गरिएको नेकपा निकट एक सहकारीकर्मीले बताए ।

त्यस भोजमा प्रतिनिधि सभा सदस्य नवराज सिलवाल, प्रदेश सांसदहरु चेतनाथ सन्जेल र राजकाजी महर्जनको उपस्थिति रहेको स्रोतले बतायो ।

स्रोतका अनुसार आज शुक्रबार बेलुका लगनखेल स्थिति साझा पार्टी प्यालेसमा नेकपा निकट सहकारीकर्मीहरुको भोज रहेको बतायो ।

घिमिरेको रणनीति घर घर जाने

उता वर्तमान अध्यक्ष तथा अध्यक्षका उम्मेदवार रामशरण घिमिरेले पनि देखिने गरि कुनै भोज नराखे पनि घर घर पुगेर मतदाता प्रभावित पार्न खोजीरहेका छन । उनी कम्युनिस्ट शैलीमा मतदाताको घर घर पुगेर मत मागिरहेका हुन ।

उनले जसरी पनि सहकारी चुनाव जित्ने र तेस्रो पटक अध्यक्ष बन्ने रणनीति लिएका छन । सोही कारण उनी प्रत्येक मतदाताको घर पुगिरहेका छन । उनलार्इ काङ्ग्रेस निकट प्रजातान्त्रिक सहकारीकर्मीहरुको र केही नेकपा निकट असन्तुष्ट सहकारीकर्मी समुहको साथ रहेको छ । भोलीदेखि आचारसंहिता लाग्ने भएकोले घिमिरेले सकभर धेरैलाई विभिन्न आश्वासन दिएका स्रोतले जनाएको छ । आफू अध्यक्ष भए जस्तो सहयोग गर्न पनि तयार रहेको घिमिरेले जवाफ दिएका छन ।

चुनावमा को बलियो ?

एमाले र माओवादी केन्द्रबिचको एकताको कारण ललितपुरको सहकारीमा नेकपा नै बलियो रहेता पनि पछिल्लो चरणमा वर्तमान अध्यक्षका प्रत्याशी रामशरण घिमिरेले आफ्नो पकड बलियो पारेको अबस्थामा छ ।

बजगाई पदलुप्त स्वभाव भएको कारणले उनीप्रति नेकपाका केही सहकारीकर्मी असन्तुष्ट रहेका छन् । घिमिरे दुई कार्यकाल अध्यक्ष भएकोले उनको सम्बन्ध तल्लोस्तरमा रहेको, प्रजातान्त्रिक सहकारीकर्मीहरुको र नेकपा निकट सहकारीकर्मीहरुको असन्तुष्ट समूहहरुको साथ घिमिरेलाई छ ।

उता बाहिर सहयोग गरेजस्तो गरेपनि भित्र भित्र भने बजगाईलाई मत नदिने केहीले भन्ने गरेका आधारमा यो चुनाव कांग्रेस निकट घिमिरे प्यानलले हात पार्ने देखिन्छ । नेकपा निकट सहकारीकर्मीहरुले यो चुनावलाई जीवन मरणको संज्ञा दिदै सहकारीकर्मीहरुलाई आफूतर्फ आकर्षित गर्न अनेक हत्कन्डा अपनाएका छन् । यता दक्षिण ललितपुरमा अवस्थित सहकारीकर्मीहरुले एकढिक्का भएर वर्तमान अध्यक्ष रामशरण घिमिरेलाई जिताउन हिडेको स्रोतले बतायो ।

दुई कार्यकाल अध्यक्षको जिम्मेदारी सम्हालेका घिमिरेले बचत संघलाई देशभरिकै उत्कृष्ट बचत संघ बनाइ दुइ राष्ट्रिय पुरस्कार दिलाउन सफल भएका कारण यस पटक पनि घिमिरे प्यानलले नै बिजयी हात पार्ने नेकपा निकट असन्तुष्ट सहकारीकर्मिले बताए।

यसैबिच नेकपा निकट महालक्ष्मी नगरपालिका लुभु निवासी राम शरण घिमिरेले बागी उम्मेदवारी दिएका छन्। पुर्व एमाले निकट रहेका घिमिरेलाई नेकपा निकट बजगाईं प्यानलले प्यानल भित्र नराखेपछि घिमिरेले बागी उम्मेदवार दिएका हुन्।

उनले संक्षिप्त प्रतिक्रिया दिँदै भने- म नेकपा निकट बजगाईं प्यानल भित्र पर्न सकिन, त्यसैले स्वतन्त्र उम्मेदवारी दिएको हु।

घिमिरेको बागी उम्मेदवारीले पनि लोकतान्त्रिक प्यानललाई बलियो बनाउन मद्दत पुगेको छ।