सत्य, निष्पक्ष र खोजमुलक समाचार
मगलवार, ७ जेठ २०७६ / Tuesday, 21 May 2019

अन्तर्राष्ट्रिय महिला दिवसको पूर्वसन्ध्यामा गोदावरी नगरपालिकाको अन्तरक्रिया कार्यक्रम


प्रकाशित समय: बिहिवार, ०८ : १५ बजे फाल्गुन २३ गते



अन्तर्राष्ट्रिय महिला दिवसको पूर्वसन्ध्यामा गोदावरी नगरपालिकाको अन्तरक्रिया कार्यक्रम

ललितपुर,हरेक वर्ष मार्च ८ तारिकका दिन मनाउँदै आउने गरेको अन्तर्राष्ट्रिय महिला दिवस गोदावरी नगरपालिकाले पनि बिभिन्न कार्यक्रम गरी मनाइएको छ।

 

नगरपालिकाले "लैंगिक समानताका लागि समान सोच र व्यवहार : समृद्धिको आधार" भन्ने मुल नाराका साथ १०९ औं अन्तर्राष्ट्रिय महिला दिवसको पुर्व सन्ध्यामा सरोकारवालाबीच अन्तरक्रिया कार्यक्रम गरी मनाएको हो। सन् १९११ मार्च ८ मा महिला अधिकारकर्मी क्लारा जेटकिनले महिलामाथि हुने श्रमशोषणको बिरुद्ध आवाज उठाएको दिन भएकाले सोही दिनदेखि विश्वभर अन्तर्राष्ट्रिय महिला दिवस मनाउन थालिएको हो। यो दिवसलाई नारीदिवस पनि भन्ने गरिन्छ। यस दिन नेपालमा पनि बिभिन्न कार्यक्रम गरी अन्तर्राष्ट्रिय महिला दिवस मनाउने गरिन्छ।

 

यसैक्रममा कार्यक्रमका प्रमुख अतिथीको रुपमा रहेका गोदावरी नगरपालिका प्रमुख गजेन्द्र महर्जनले कार्यक्रममा बोल्दै अहिले पनि समाजमा महिला शोषित अपहेलित हुनुपरेको कुरा बताए। नगरप्रमुख महर्जनले संविधानले महिलाहरूको लैंगिक अधिकारलाई सम्मान गरेकोले अधिकारप्राप्तिका लागि महिला अझ सशक्तरुपमा अघि बढ्नुपर्ने बताए। उनले भने-"हिंसा गर्नुभन्दा हिंसा सहनु ठूलो अपराध हो, त्यसैले हिंसा गर्नेमात्र नभई हिंसा सहनु पनि हुँदैन।"उनले महिला अधिकारका विषयमा नगरपालिका सधैं उदार रहेको प्रस्ट्याए।

 

यसैक्रममा गोदावरी नगरपालिका महिला तथा बालबालिका शाखाका शाखा प्रमुख निर्मला कार्कीले कार्यपत्र प्रस्तुत गर्दै महिला विकासका कार्यक्रम, नीतिगत प्रयासहरु, संविधानभित्रका प्रावधानहरु र महिला अधिकारका लागि समस्याहरु बारे प्रष्ट पारेकी थिइन्।

 

कार्यक्रममा अनौपचारिक क्षेत्र सेवा केन्द्र इन्सेकका प्रतिनिधि रमेश प्रसाद तिमल्सिनाले महिला हिंसा र ज्यादतीका घटनालाई अध्ययन गरेर तयार पारेको प्रतिवेदन प्रस्तुत गरेका थिए। कार्यक्रममा सहभागी सहकारीकर्मी महिला गंगादेवी मूलले कानुन भएपनि कार्यान्वयन फितलो भएका कारण महिलाहरुले समस्या भोग्नुपरेको कुरा राखिन्।

 

इन्सेकका प्रदेश नं ३का अध्यक्ष कृष्ण गौतमले महिला अधिकारका कुरा गर्दा पहिलेको भन्दा अहिले धेरै राम्रो भएको बताए। संविधानले महिला पुरुषलाई बराबर अधिकार दिएकाले महिलाका नराम्रो पक्ष मात्रै होइन राम्रा पक्ष पनि रहेको प्रस्ट्याए।

 

नगरका प्रमुख प्रशासकीय अधिकृत कृष्णप्रसाद जैशीले महिला अधिकारका विषयमा काम गर्ने संघसंस्थासँग सहकार्य गरेर कार्यक्रम अगाडि बढाउन र परिणाम दिन सके महिला अधिकारको सुनिश्चिता हुने बताए।

 

कार्यक्रमको अध्यक्षता गरेकी उपप्रमुख मुना अधिकारीले महिला अधिकारका विषयमा नीतिनियम भएको तर कार्यान्वयन गर्ने दिशामा फितलो हुँदा महिला दिदीबहिनी पीडित हुनुपरेको बताइन्। उनले महिला दिदीबहिनीहरुले आफ्नो अधिकार खोज्ने मात्र नभइ आफै सचेत हुनु जरुरी रहेको बताइन्।

 

उनले महिला दिदीबहिनीहरु अहिलेपनि अपहेलित शोषित र बलत्कारको शिकार हुनु परेकाले त्यस्ता दिदीबहिनीहरूको लागि नगरपालिकाभित्र संरक्षण केन्द्रको स्थापना गर्न जरुरी रहेकोले आजैबाट पहल थाल्ने प्रतिवद्धता जाहेर गरिन्।

 

कार्यक्रममा महिला सदस्य गौरी अधिकारी, सामाजिक विकास समितिका संयोजक भाष्कर थापा, वडा नम्बर ३ का वडा अध्यक्ष बालमुकुन्द घिमिरे लगायतले कार्यक्रमका विषयमा बोल्दै महिला अधिकारको सुनिश्चितताका लागि आ-आफ्नो क्षेत्रबाट सक्दो पहल गर्ने बताए।