‘म निर्दोष छु, केही दिनभित्रै स्वदेश फर्कन्छु’

काठमाडौं । नेपाल क्रिकेट सङ्घ क्यानले राष्ट्रिय क्रिकेट टोलीका कप्तान सन्दीप लामिछानेलाई टिमबाट निलम्बन गरेको छ । १७ वर्षका एक किशोरीलाई बलात्कार गरेको आरोपमा जाहेरी दर्ता भएपछि क्यानको कार्यसम्पादन समितिले लामिछानेलाई कप्तानसहित राष्ट्रिय टोलीबाट निलम्बन गरेको जनाएको छ । गत मङ्गलवार प्रहरी वृत्त गौशालामा जाहेरी परेसँगै प्रहरीले लामिछानेविरुद्धका प्रमाण सङ्कलन सुरु गरेको छ । 
यसैबीच बलात्कारको आरोप लागेका लामिछानेले स्वदेश फर्कने बताएका छन् । सिपिएल खेल्न गएका लामिछानेले आज ट्वीट गर्दै आफू निर्दोष रहेको र नेपालको कानुनमा विश्वास रहेको भन्दै सिपिएल छाडेर छिट्टै स्वदेश फर्कने सामाजिक सञ्जालमार्फत जानकारी गराएका छन् ।