मन्त्रिपरिषद्को आकस्मिक बैठक बस्दै, अर्याललाई मुख्यसचिव बनाउने तयारी

काठमाडौं । प्रधानमन्त्री पुष्पकमल दाहालले मन्त्रिपरिषद् आकस्मिक बैठक बोलाएका छन् । बैठक बिहान साढे ९ बजे प्रधानमन्त्री तथा मन्त्रिपरिषद्को कार्यालय सिंहदरवारमा बस्न लागेको कृषि तथा पशुपंक्षी मन्त्री बेदुराम भुसालले जानकारी दिए ।

भुसालका अनुसार आजको बैठकमा संसदमा हुने मन्त्रालयगत बजेट छलफल र समसामयिक विषयमा छलफल हुनेछ । प्रधानमन्त्रीले वर्तमान मुख्यसचिव शंकरदास वैरागीको कार्यकाल सकिन लागेकाले प्रधानमन्त्री तथा मन्त्रिपरिषद्को कार्यालयका वरिष्ठ सचिव डाक्टर वैकुण्ठ अर्याललाई मुख्यसचिव बनाउने तयारी गरेका छन् । मुख्यसचिव वैरागीको कार्यकाल आगामी असोज दोस्रो सातासम्म रहेको छ । डा. अर्याल यही असार ३ गते अवकाशमा जाने भएकोले त्यस अघि अघि नै नियुक्त गर्न लागिएको हो ।