प्रतिनिधिसभाबाट आगामी आर्थिक बर्षको बजेट बहुमतले पारित

काठमाडौं । प्रतिनिधिसभाबाट विनियोजन विधेयक २०८० बहुमतले पारित भएको छ ।

बुधबार बसेको प्रतिनिधिसभा बैठकमा भएको मतबिभाजनमा सरकारले ल्याएको विनियोजन विधेयक बहुमतले पारित भएको हो ।

मतविभाजनका क्रममा विनियोजन विधेयकको पक्षमा एक सय ४७ मत परेको थियो भने विपक्षमा एक सय ८ मत परेको थियो । मत विभाजन हुँदा २५५ जना सांसद उपस्थित थिए । सभामुख देवराज घिमिरेले विनियोजन विधेयक २०८० लाई पारित गरियोस भन्ने प्रस्तावको पक्षमा १ सय ४७ मत परेको र उक्त संख्या प्रतिनिधिसभाको बहुमत भएकाले विनियोजन विधेयक २०८० लाई पारित गरियोस भन्ने प्रस्ताव बहुमतले पारित भएको घोषणा गर्नुभयो ।

त्यसअघि बैठकमा सभामुख घिमिरेले ध्वनी मतका आधारमा विनियोजन विधेयकलाई अघि बढाउन खोज्दा एमालेले मतविभाजको माग गरेको थियो । मतबिभाजनका क्रममा विनियोजन विधेयक बहुमतले पारित भएको हो ।