एमालेको बागमती प्रदेश अधिवेशन सुरु

काठमाडौं । नेकपा एमालेको बागमती प्रदेश अधिवेशन सुरु भएको छ । ड्रोन उडाएर र रिमोटबाट दियो बालेर काठमाडौंमा कार्यक्रम उदघाटन गरिएको छ ।

अधिवेशन उदघाटनपूर्व निकालिएको र्‍याली रत्नपार्कदेखि अधिवेशन स्थल भृकुटीमण्डपसम्म पुगेको थियो ।अधिवेशनमा एक हजार ८० जना प्रतिनिधिहरु छन् । उनीहरुले २४० सदस्यीय नयाँ नेतृत्व चयन गर्ने छन् । अधिवेशनले १ अध्यक्ष, १ उपाध्यक्ष, १ सचिव र २ उपसचिवसहितको कमिटी चयन गर्नेछ ।

अध्यक्ष पदमा झण्डै आधा दर्जन बढी नेता आकांक्षी छन् । अध्यक्षका लागि वर्तमान अध्यक्ष केशव पाण्डे, कृष्ण दाहाल, कैलाश ढुंगेल, विजय सुवेदी, भूमि त्रिपाठी, खेम लोहनी, कृष्णभक्त पोखरेल लगायत आकांक्षी छन् ।सर्वसम्मत अध्यक्ष चयनको प्रयास भइरहेकाे छ । यदि चुनाव हुने स्थिति आएमा केशवराज पाण्डे, कैलाश ढुंगेल र कृष्ण दाहालबीच प्रतिस्पर्धा हुने अनुमान छ ।

अधिवेशनलाई प्रविधिमैत्री बनाउन उद्घाटन रोबोटको माध्यमबाट गरिएकाे छ भने नेतृत्व चयनमा सर्वसम्मति नभए विद्युतीय भोटिङ मेसिनमार्फत् मतदान गराइने गरी तयारी भइरहेको छ ।