८ भाइले युद्ध जितेरै आएपछि गला जोड्यौं : उद्धव थापा

विराटनगर । नेपाली कांग्रेस संसदीय दलका नेता उद्धव थापाले कोशी प्रदेश सरकारको मुख्यमन्त्री बनाउने म्युजिकल चेयरको खेल सकिएको बताएका छन् ।

बुधबार प्रदेशसभा बैठकमा मुख्यमन्त्री केदार कार्कीले राखेको विश्वासको मतसम्बन्धी प्रस्तावमा धारणा राख्दै उनले कांग्रेसका ८ भाइ सांसदहरूले मुख्यमन्त्री बन्न झगडा गरेको बताए । मुख्यमन्त्री बन्न झगडा गरेर कुण्ठा पोखेको र युद्धमा गएको भन्दै उनले युद्ध जितेर घर आएकाले गला मिलाएको टिप्पणी गरे ।

थापाले भने, ‘युद्धमा गएका साथीहरू जितेर माला लाएर फर्किसक्नु भो त्यसैले हामीले गलामात्र नभएर गाला पनि मिलाइ सक्यौं ।’

उनले गाला जोडाउने कला एमालेसँग सिकेको बताए । एमालेसहितको समर्थनमा मुख्यमन्त्री बनेकाले अब सबै मिलेर प्रदेशलाई प्रगतिको बाटोमा लैजानुपर्ने उनको भनाइ छ । एमालेभित्र द्वन्द्व, झगडा भए पनि आवश्यक पर्दा मिल्ने प्रवृत्ति देखिएको भन्दै अहिले कांग्रेसले पनि एमालेबाट पाठ सिकेको बताएका हुन् ।

उनले अब मुख्यमन्त्री कार्कीलाई सम्मानका साथ विश्वासको मत दिने पनि बताए ।

नेता थापाले मुख्यमन्त्रीलाई समर्थन गर्ने एमालेलाई आफ्नो समर्थन कायम राखिराख्न आग्रह गरे । एमाले संसदीय दलका नेता हिक्मतकुमार कार्कीले केन्द्रबाट जे निर्देशन भए पनि प्रदेशमा आपसमा मिलेर जाने प्रतिवद्धता गरेको भन्दै उनले भने, ‘त्यो लागू होस् शुभकामना दिन चाहन्छु ।’