उपरथी पाण्डे र ऊर्जा सचिव घिमिरेको राजीनामा मन्त्रिपरिषदबाट स्वीकृत

काठमाडौं । सरकारले नेपाली सेनाका उपरथी ताराध्वज पाण्डेको राजीनामा स्वीकृत गरेको छ ।

सिंहदरबारमा बिहीबार बसेको मन्त्रिपरिषद् बैठकले पाण्डेको राजीनामा स्वीकृत गर्ने निर्णय गरेको हो । पाण्डेले व्यक्तिगत कारण देखाउँदै पदबाट राजीनामा दिनुभएको थियो ।

त्यस्तै बैठकले ऊर्जा मन्त्रालयका सचिव दिनेश कुमार घिमिरेले दिएको राजीनामा पनि स्वीकृत गर्ने निर्णय गरेको सरकारका प्रवक्ता रेखा शर्माले जानकारी दिनुभयो । मन्त्रिपरिषद्ले गृह मन्त्रालयको प्रस्तावमा सुनको अवैध तस्करीबारे जाँचबुझ गठन गठन भएको आयोगको माग बमोजिम ४ जना प्राविधिक जनशक्ति थप गर्ने निर्णय गरेको छ भने प्राविधिक शिक्षाको क्षेत्रमा स्वीटजरल्याण्ड सरकारले प्रदान गर्ने करिब ६५ करोड रुपैयाँ अनुदान स्वीकृत गर्ने निर्णय भएको प्रवक्ता शर्माले जानकारी दिनुभयो ।

बैठकले विद्युत सुशासन आयोगको सदस्य पदमा पूर्णबहादुर कुँवरलाई नियुक्त गर्ने निर्णय गरेको छ ।