ललितपुर महानगरमा ईः को बिरुद्ध स्थानीयकाे प्रदर्शन

काठमाडौं ।फुटपाथ व्यवसायीलाई हटाउने ललितपुर महानगरपालिकाको निर्णयकोे विरोधमा आन्दोलन गर्न लागेका अभियन्ता ईः बिरुद्ध स्थानीयले प्रदर्शन गरेका छन् ।

फुटपाथ व्यवसायीलाई हटाउने महानगरको निर्णय उचित भएको र यसको बिरोध गर्न नहुने भन्दै स्थानीयहरुले अभियन्ता ईः बिरुद्ध प्रदर्शन गरेका हुन् ।फुटपाथ व्यवसायीलाई हटाउने ललितपुर महानगरको निर्णयबिरुद्ध अभियन्ता ईःले महानगरपालिकाको प्रांगणमा उभिएर प्रदर्शन गर्न खोज्नुभएको थियो । तर स्थानीयहरुले सडकमा व्यापार गर्न नपाईने भन्दै अभियन्ता ईः विरुद्ध नै प्रदर्शन गरेका थिए ।

स्थानीयको प्रदर्शनपछि सुरक्षाकर्मीले महानगरभित्र अभियन्ता ईः लाई सुरक्षा दिएर राखेको थियो । त्यसपछि कडा सुरक्षाकाबीच सुरक्षाकर्मीले अभियन्ता ईः लाई त्यहाबाट निकालेको थियो ।महानगरपालिकाले मंसिर २४ गतेदेखि लगनखेल–मंगलबजार क्षेत्रमा फुटपाथ राख्न निषेध गरेको थियो । तर अभियन्ता ईः ले फुटपाथ व्यवसायीलाई विकल्पसहित व्यवस्थापन गर्नुपर्ने भन्दै उभिएर विरोध गर्न खोज्नुभएको थियो ।

यसअघि पनि काठमाडौं महानगरले फुटपाथ व्यवसायीलाई हटाउने निर्णय गर्दा अभियन्ता ईःले राष्ट्रिय सभागृहबाहिर १ सय ९९ घण्टा उभिएर विरोध जनाउनुभएको थियो । त्यसपछि काठमाडौं महानगर र अभियन्ता ईः बीच सम्झौता भएको थियो ।