प्रविधिमय शिक्षण विधिले ललितपुरको शैक्षिक उत्कृष्टता थप्न सहयोग पुग्नेछ-मेयर चिरीबाबु

ललितपुर - ललितपुर महानगरपालिकाका मेयर चिरीबाबु महर्जनले ललितपुर महानगरपालिका देशकै उत्कृष्ट विद्यालयहरु रहेको बताए । उनले भने,‘यस प्रविधिमय शिक्षण विधिले ललितपुरको शैक्षिक उत्कृष्टता थप्न सहयोग पुग्नेछ ।’ तालिमका सहभागी शिक्षकका लागि यो एउटा सुनौलो अवसर भएको बताउँदै प्रभावकारी बनाउने जिम्मेवारी तालिम लिने शिक्षकको नै भएको बताए ।

ललितपुर महानगरपालिकाको आयोजनामा जापानका मियागो विश्वविद्यालय, केडीडीआइ फाउण्डेसन, सिटिनेट योकोहामाको सहयोगमा आयोजना गरिएको तालिममा प्रत्येक विद्यालयबाट दुई जना शिक्षक सहभागी छन् । तालिम उद्घाटन कार्यक्रममा नेपालका लागि जापानका राजदुत मासामिसी साइगोले ललितपुरमा यो कार्यक्रम सुरुवात भएकोमा एकदमै खुशी लागेको बताए । उनले सूचना र प्रविधिले शिक्षण सिकाईलाई प्रभावकारी बनाउनेमा विश्वस्त भएको स्पष्ट पारे ।

ललितपुर महानगरपालिकाका शिक्षा प्रमुख महेन्द्रबहादुर क्षेत्रीले पहिलो अनुभव भएको बताउँदै शिक्षक र विद्यार्थीको सक्रियतामा यससको प्रभावकातिा प्रष्ट हुने बताए । केडिडिआइ फाउन्डेसनका उपाध्यक्ष मासाजुनि इनाओले सूचना र प्रविधिको प्रयोग गरेर प्रयोगमा ल्याइने विद्यालयमा संचालन गरिने रोबोट कार्यक्रमले विद्यार्थीमा बौद्धिक क्षमता, समस्या समाधान र र सिर्जनशील बन्न सहयोग गर्ने बताए ।

तालिम लिएका शिक्षकहरुले विद्यार्थीमा बौद्धिक क्षमता विकास गर्न , सिर्जनशील हुन र आइपर्ने समस्याको समाधान निकाल्न रोबोटमार्फत सिकाउने छन् । विद्यालयलाई रोबट र अन्य प्राविधिक सहयोगको व्यवस्था तालिम आयोजन ागर्न सहयोग गर्ने संस्थाहरुले नै गर्नेछन् ।

पाँच दिनसम्म चल्ने उक्त तालिममा विद्यालय तहका विद्यार्थीलाई सूचना, संचार र प्रविधिमार्फत विद्यार्थीमा यी सीपका विकास गरिनेछ ।