सत्य, निष्पक्ष र खोजमुलक समाचार
बुधवार, ८ जेठ २०७६ / Wednesday, 22 May 2019

गोदावरी क्षेत्र पर्यटकीय रुपले अत्यन्तै सुन्दर-मन्त्री महासेठ


प्रकाशित समय: सोमवार, ०६ : ०५ बजे फाल्गुन २७ गते



गोदावरी क्षेत्र पर्यटकीय रुपले अत्यन्तै सुन्दर-मन्त्री  महासेठ

ललितपुर,- गोदावरी क्षेत्र पर्यटकीय रुपले अत्यन्तै सुन्दर रहेको भौतिक योजना तथा यातायात मन्त्री रघुवीर महासेठले बताउनुभयो ।  गोदावरी नगरपालिकाले  तेस्रो स्थापना दिवसमा बोल्दै मन्त्री महासेठले विकास निर्माणका काम क्रमशः हुँदै जाने भएकोले त्यसलाई क्रमिक रुपमा सवैले आ–आफ्नो स्थानवाट पहल गरिनुपर्नेमा जोड दिनुभयो । 

 

सो अवसरमा पारेर नगरपालिकाले तयार पारेको नगर गीत फुल्चोकीको शीर, बाग्मतीको तीर भौतिक योजना तथा यातायात मन्त्री रघुवीर महासेठले सार्वजनिक गर्नुभयो ।

 

विस २०७४ सालमा सम्पन्न भएको तीनै तहको निर्वाचनले तीनै तहको सरकार निर्माण भएको बताउँदै,स्थानीय निकायको सही कामलाई प्रदेश वा केन्द्रले हस्तक्षेपकारी भूमिका खेल्नु उचित नभएको उहाँले तर्क गर्नुभयो । यसै गरी प्रदेशले लिएको सकारात्मक कामलाई समेत केन्द्र सरकारले हस्तक्षेप गर्न मिल्दैन–उहाँले भन्नुभयो ।

 

उहाँले सातदोवाटो–चापागाउँ–गोदावरी खण्डको सडक मापदण्ड अनुरुप नै निर्माण गरिनुपर्नेमा जोड दिदैं  विकास निर्माणका काममा बजेटको अभाव हुन नदिने प्रतिवद्धता समेत जनाउनुभयो । 

 

नगरप्रमुख गजेन्द्र महर्जनले नगरपालिकाको तेस्रो स्थापना दिवससम्म आइपुग्दा नगरपालिकाले विकासका कामहरुलाई तीव्र रुपले अगाडि बढाइरहेको बताउनुभयो । प्राकृतिक रुपमा सुन्दर रहेको गोदावरीलाई धार्मिक–पर्यटकीय रुपमा विकास गरिँदै लैजाने लक्ष्य रहेको उहाँले बताउनुभयो ।

 

जनतिनिधि भएर नगरपालिकामा आइसकेपछि यस क्षेत्रको विकास तीव्र रुपमा भइरहेको उहाँको भनाई थियो । यस क्षेत्रमा रहेको खानोपानीको समस्याको समाधान क्रमिक रुपमा भईरहेको नगरप्रमुख महर्जनले बताउनुभयो । खानेपानी समस्या समाधानका लागि हालसम्म तीनवटा डिप बोरिङ सम्पन्न भइसकेको तथा अर्को एउटा शुरु भइरहेको उहाँले बताउनुभयो ।

 

यसै गरी गोदावरी क्षेत्रलाई राष्ट्रिय तथा अन्तर्राष्ट्रिय रुपमा चिनाउने गरी गोदावरी बहुउद्देश्यीय रङ्गशालाको निर्माण,देवीचौरमा भ्यूटावरको निर्माण कार्यको प्रारम्भ भइरहेको छ–उहाँले भन्नुभयो ।  विकास निर्माणको काममा जनप्रतिनिधि र कर्मचारी एकजुट भएर अघि बढ्नुपर्नेमा उहाले जोड दिनुभयो ।

 

 नगरउपप्रमख मुना अधिकारीले समृद्ध नगरपालिका निर्माण कार्यमा सवैको साथ र सहयोग अपरिहार्य रहेको बताउनुभयो । यस क्षेत्रलाई साँच्चै नै नमुना नगरपालिका बनाउने लक्ष्यमा सिङ्गो नगरपालिका जुटेका छौं–उहाँले भन्नुभयो ।

 

स्थापना दिवसको अवसर पारेर नगरपालिकाका उत्कृष्ट कर्मचारीहरुलाई नगद सहित दोसल्ला ओढाएर सम्मान गरिएको थियो । सम्मानित हुने कर्मचारीहरुमा इञ्जिनियर सुनिल श्रेष्ठ, नायव सुव्वा जयराम सिलवाल, सहायक कम्प्युटर अपरेटर कमला थापा, सामाजिक परिचालक इन्द्र तामाङ तथा कार्यालय सहयोगी उतम थापा रहेको थियो । सम्मानित प्रत्येक व्यक्तिले नगद रु. पाँच हजार र प्रमाणपत्र पाउनुभएको थियो ।

 

 कक्षा १२ को नतिजा अनुसार राष्ट्रिय स्तरमा तृतीय स्थान हासिल गर्न सफल बज्रवाराही माध्यमिक विद्यालयलाई रु. एक लाख सहित नगरपालिकाले सम्मान गरेको छ । नगर गीतको रचनाकार बशिष्ठ अधिकारी तथा सो गीतमा संगित दिनुहुने आलोक श्रीलाई कदर–पत्रले सम्मान गरेको थियो ।

 

यसै गरी नगर गीतमा स्वर दिनुहुने कलाकार प्रताप दास, धर्मेन्द्र सेवाङ तथा निशा देशारलाई समेत कदर–पत्रवाट सम्मान गरिएको थियो । महिला, बालवालिका तथा शैक्षिक क्षेत्रमा दख्खल राख्नुहुने सञ्चारकर्मी दिपक अर्याललाई नगरपालिकाले सम्मान गरेको छ ।

 

कार्यक्रममा प्रतिनिधि सभा सदस्य नवराज सिलवाल, प्रदेशसभा सदस्य चेतनाथ सञ्जेल, राजकाजी महर्जनलगायतको उपस्थिति रहेको थियो ।