जनमोर्चाद्वारा प्रदेशसभा दलका नेतालाई कारबाही

काठमाडौं । राष्ट्रिय जनमोर्चाले सो पार्टीका गण्डकी प्रदेशसभा संसदीय दलका नेता कृष्ण थापालाई दलको नेताबाट हटाएको छ ।

प्रदेशमा विपक्षी नेपाली काँग्रेसको नेतृत्वमा नयाँ सरकार गठन गर्ने सम्बन्धमा हस्ताक्षर गर्न अस्वीकार गरेको जनाउँदै थापालाई नेताबाट हटाइएको जनमोर्चाका केन्द्रीय महासचिव मनोज भट्टले जानकारी दिनुभयो । 

नेता थापा भने आफूलाई प्रक्रियाविपरीत दल नेताबाट हटाइएको जनाउनुभएको छ । थापाले अस्वीकार गरेपछि विपक्षीलाई बहुमत सङ्ख्या प्रस्तुत गर्न चुनौती भएको छ ।

पार्टीले यसअघि नेपाली काँग्रेस, नेकपा माओवादी केन्द्र, जनता समाजवादी पार्टीसहित मिलेर सरकार गठन गर्ने निर्णय गरेको थियो ।

 प्रदेशसभा सदस्य थापालाई संसदीय दलको नेताबाट हटाइएको पत्र गण्डकी प्रदेशसभा सचिवालयमा दर्ता गराइएको छ । 

यही वैशाख २६ गते प्रदेशका मुख्यमन्त्री पृथ्वीसुब्वा गुरुङले पदबाट राजीनामा दिएपछि प्रदेश प्रमुख सीताकुमारी पौडेलले तीन दिनभित्र नयाँ सरकार गठनका लागि दलहरूलाई आह्वान गर्नुभएको थियो ।