सङ्खुवासभामा भएको सामूहिक हत्याका आरोपीलाई प्रहरीले सार्वजनिक गर्दै

काठमाडौँ, २७ भदौ।सङ्खुवासभामा एकै परिवारका ६ जनाको हत्यामा संलग्न भएको आरोपमा पक्राउ परेका युवालाई प्रहरीले आज सार्वजनिक गर्दैछ ।

पक्राउ परेका युवालाई बिहान १० बजे चैनपुरमा पत्रकार सम्मेलन गरेर सार्वजनिक गर्न लागिएको जिल्ला प्रहरी कार्यालय सङ्खुवासभाका प्रहरी नायव उपरीक्षक लालध्वज सुवेदीले जानकारी दिनुभयो । उहाँका अनुसार ती युवकले घटनामा आफ्नो संलग्नता स्वीकार गरिसकेका छन् । मादी नगरपालिका–१ स्थित तेजबहादुर कार्कीसहित उहाँको परिवारका ६ जनाको गत सोमबार बिहान शव फेला परेको थियो । त्यसपछि सोमबार बेलुकी घटनास्थल पुगेको प्रहरी टोलीले मंगलबारदेखि अनुसन्धान थालेको थियो ।