स्वर्णिम वाग्ले १४ हजार ७९६ मतान्तरले विजयी

तनहुँ । प्रतिनिधिसभा सदस्य उपनिर्वाचनमा राष्ट्रिय स्वतन्त्र पार्टी (रास्वपा) का उम्मेदवार डा स्वर्णिम वाग्ले विजयी भएका छन् । तनहुँ क्षेत्र नम्बर १ बाट वाग्ले करिव १५ हजार मतान्तरले विजयी भएका हुन् । वाग्लेले ३४ हजार ९१८ पाउँदा निकटतम प्रतिस्पर्धी नेपाली कांग्रेस उम्मेदवार गोविन्द भट्टराईले २० हजार १२२ मत पाए । वाग्लेले भट्टराईभन्दा १४ हजार ७९६ मत बढी ल्याएका छन् ।

नेकपा एमालेका उम्मेदवार सर्वेन्द्र खनाल ८ हजार ४८८ मतमा सिमित भए । राप्रपाकी शोभा गुरुङले २१८ र मंगोल नेशनल अर्गनाइजेसनका प्रेमबहादुर थापाले १६६ मत पाएका छन् । मंसिर ४ गतेको निर्वाचनमा नेपाली कांग्रेस विजयी भएको थियो । उक्त निर्वाचनमा कांग्रेस नेता रामचन्द्र पौडेल निर्वाचित भएका थिए । पौडेल राष्टपति निर्वाचित भएपछि उक्त क्षेत्रमा उपनिर्वाचन भएको हो ।