भुटानी शरणार्थी प्रकरण : अहिलेसम्म ७ अभियुक्तको बहस सकियो

काठमाडौं । नक्कली भुटानी शरणार्थी प्रकरणमा शुक्रबारसम्म सातजना अभियुक्तको थुनछेक बहस सकिएको छ । काठमाडौं जिल्ला अदालतका न्यायाधीश प्रेमप्रसाद न्यौपानेको इजलासमा आइतबारबाट भएको थुनछेक बहस सुरु भएको थियो ।

मंगलबारसम्म सरकारी वकिल तथा जाहेरवालाको तर्फबाट बहस भएको थियो । बुधबारबाट अभियुक्तहरूको तर्फबाट बहस सुरु भएको थियो ।शुक्रबारसम्म अभियुक्तमध्येका केशव दुलाल, सानु भण्डारी, सागर राई, सन्देश शर्मा, टंक गुरुङ, इन्द्रजित राई र टोपबहादुर रायमाझीका कानुन व्यवसायीहरूले बहस गरेका छन् । कानुन व्यवसायीहरूले आफ्ना पक्षलाई साधारण तारेख वा सामान्य धरौट माग गरिरहेका छन् ।

आइतबार पनि थुनछेक बहसले निरन्तरता पाउने छ । आइतबार अभियुक्तमध्येका सन्दीप रायमाझीका कानुन व्यवसायले बहस गर्नेछन् ।

न्यायाधीश न्यौपानेले बहसको पहिलो दिन नै अभियुक्तहरूका कानुन व्यवसायीलाई आगामी मंगलबार (जेठ ३०) भित्र बहस सक्न भनेका थिए । जसअनुसार अब बाँकी रहेका ११ जनाको बहस अबको तीन दिनभित्र सकिने छ ।

बुधबार सरकारी वकिलले जवाफी बहस गर्ने छन् । त्यसपछि इजलासले थुनछेक आदेश दिने छ ।